蔗渣价。烧鹅味 Mitsubishi Fuso Super Great 38T

强势回归Mitsubishi Fuso Super Great 38T


今次代理非常重视Super Great车系,一口气引入拖头及吨车共4个型号。


喺八、九十年代,三菱可以话威到尽,係高性能嘅代名词,私家车、跑车、四驱车,甚至货车,都捞到瓣瓣掂。

今时今日又点?

咩话?你几乎唔记得咗呢间车厂?又难怪嘅,三菱近十年可以话沉寂晒,私家车卖得唔算多,连挂上Fuso品牌嘅货车都因为欠缺旗舰车款,而少咗啲fans。不过,正所谓「蛇无头不行」,Fuso旗舰车系Super Great阔别12年,终于回归战场,係时候好似Marvel电影咁,进入另一个阶段。


据知Fuso喺开发新Super Great嘅时候为整个项目命名,就係用上「黑豹Black Panther」,所以试车都有呢个贴纸拉花。


全线车系到港

三菱嘅商用车阵容庞大,由小巴、中型货车,甚至重型拖头都有,而Super Great其实就係Fuso货车中最新、最重型嘅车款,分别有24吨、30吨货车,同埋38吨、44吨嘅拖头。外表上嘅主要分别当然係三轴、四轴长车阵,同埋两轴、三轴拖头。而今次我们测试嘅,正正係採用单尾轴驱动嘅38吨拖头,可以话本港最常见。由于考虑到Super Great嘅运输用途,所以清一色採用3.2m高嘅屋仔,同车内空间唔算好宽敞,但仍保留卧床及一定嘅储物空间,够晒司机大佬日常工作用。


38吨拖头用上3.2m高屋仔,上落轻鬆,但车厢空间充唔算好阔落。


先进舒适车厢

我哋先入Super Great嘅车厢睇睇,一入车厢坐低,印象最深刻一定係司机位设有气垫式吸震功能,一坐低即时下沉,然后升回正常高度,行车时可因应车厢跳动及司机重量而即时吸震,令司机可以更专注驾驶。此外,座位嘅安全带更与座位连成一体,当座位上下吸震时都唔会磨擦到司机颈部,呢啲窝心设计唔係欧洲车专有,出品嘅Super Great都有。

或许因为Super Great阔别已久,所以车厢内所有陈设及设备都有大幅改良,軚盘3点及9点位设有多功能操作按钮,可以操作大部分行车资讯及变更设定,豪华过唔少私家车。另一样令笔者刮目相看嘅设备,一定係独有Starter Key系统,可以Keyless开车门外,更可以放入插槽,然后揿掣挞车!私家车就好多都用类似设计,拖头呢?百万欧洲车都未有呢个设备啦!


驾驶舱同中控台都「私家车化」,加入多项方便及舒适性设计。


气垫吸震座椅係Super Great标準设备,带来更舒适嘅乘坐性,对司机嘅专注力好有帮助。


插入Starter Key再揿掣,就可以启动引擎。


德国引擎技术

以往Fuso产品嘅形象,都因为三菱私家车嘅关係,而令人有辣车感觉,不过新一代Super Great今次就唔同你硬销高性能,反传统以悭家为卖点!先用上M-Benz最新嘅OM 470引擎,呢副引擎推出只有两年,係M-Benz嘅重点产品,10,677c.c.直列6汽缸配Turbo,最大马力有394ps,而最大扭力都有204kgm,低至1,100rpm就已经全数释出。单以输出数值睇,唔算非常突出,不过由于新引擎已符合欧盟六废排标準,加上10,677c.c容积比同级对手细得多,令到引擎集轻量、低废排及悭油等优点,得到大量用家推崇。


来自M-Benz嘅OM 470引擎係最新产物,集轻量化、低油耗及环保优点。


引擎细容积对于悭油当然有帮助,而且由于新引擎嘅燃烧效果比以前好得多,所以换偈油週期都长过人,厂方讲明30,000-60,000km先换一次油,对比同级车15,000km就要换油,人哋换两次偈油Super Great先换一次,保养又悭一笔。另外,柴油车每隔一段时间就要烧炭,如果行紧车就当然可以边行边烧啦,但如果好似吊车咁停车开工,呢个时候有提示需要烧炭就麻烦嘞,多数要你1小时内进行。开紧工呀,点烧?Super Great系列呢方面就有啲优势,就算出现烧炭提示,都仲可以拖4小时,够晒你成个下昼开工,而且烧炭仲可以20分钟内完成,快人一倍!对于争分夺秘嘅搵食车嚟讲,时间就係金钱嘛!


最新型嘅DPF+SCR排气鼓,可令Super Great达到欧盟六废排标準。


錶板可以显示尿素缸存量及提示烧炭状况,司机一目了然。


价欧洲货

波箱方面,Super Great採用名为ShiftPilot AMT嘅12前、2后速自动波箱,而呢个波箱建基于单极力波箱,拥有智能感应负载功能,试车当日以吉架行车,波箱会自动用5波起步,及后会跳上7波,行顺咗会好快上9波及11波,转波过程快速,但有少少挫顿,如果想顺啲,就要利用軚盘后嘅控捍设置为「M」模式,再用控桿推拉操作+/-模式,咁就可以好顺畅逐个波段上落,视乎用家需要。此外,Super Great系列中,38吨拖头嘅尾担同其他成员唔同,用上气垫式吸震系统,由4个充气囊代替叶片式弹簧,可以升降之余,行车时车尾亦冇咁弹跳,係Super Great车系中,最舒适一款。

以现时Super Great 38吨拖头卖约75万元计,比同级对手平之余,更用上德国车最新引擎及舒适设备,有接近欧洲车嘅表现,但车价足足比欧洲车平25万元,甚至比同级车对手都要平,绝对係抵买之选。


38吨拖头特别用上气垫式吸震系统,而且气囊充气后可以升高车尾,方便装拆拖架。


Super Great车价比同级对手平,但有接近欧洲车表现,相当有竞争力。


Mitsubishi Fuso Super Great 38T Spec.

引擎:10,677c.c.直六 diesel turbo

马力:394ps/1,600rpm

扭力:204kgm/1,100rpm

传动:12前、2后速自动,附+/-模式

悬挂:前叶片式、后气压式

车身:5,565 X 2,490 X 3,190(mm)

轴距:3,250mm

总重:16,000kg

总拖重:38,000kg

油缸:400L

尿素缸:60L

车价:$750,350

查询:环宇汽车(9884 3030)

 

Text:Chris

郑重声明:本文版权归原作者所有,转载文章仅为传播更多信息之目的,如作者信息标记有误,请第一时间联系我们修改或删除,多谢。

相关文章