Audi RS Q3 Sportback 试驾

导读 突破框框 SUV 车款对于车厂嚟讲绝对係一只「会生金蛋嘅鹅」,只要一出SUV就可以令整体销售量爆

突破框框

SUV 车款对于车厂嚟讲绝对係一只「会生金蛋嘅鹅」,只要一出SUV就可以令整体销售量爆升,而出SUV 车Audi 可以算係表表者,由Q2 到Q8、由细细部到大大部都有,但SUV 天生缺乏一种令人一坐上去就会热血沸腾嘅感觉,而RS 车系嘅新成员 RS Q3 Sportback 可唔可以打破呢个定律呢?



用得RS 呢个「朵」就一定要係辣嘢先衬得起啦!所以RS Q3 Sportback 同新一代TTRS共用同一副嘅EA855 引擎,即係2.5 公升直5 Turbo 引擎,喺 5,850–7,000 rpm 之间最大马力有400匹、480Nm 峰值扭力早喺1,950 - 5,850 rpm 就已经出晒嚟;配合7前速S tronic 自动波箱同quattro 恆久式四轮驱动系统之下0-100km/h 加速时间只係4.5 秒,极速就限制係250km/h。



RS Q3 Sportback 外观方面拥有专属包围、单体式车头鬼面罩、倾斜式车顶Coupe 设计、双出椭圆形大尾喉、21吋钢琴黑钛合金軨、Y字型日行灯。除此之外,新车仲配备咗 RS Sports 悬挂系统令车身高度比起标準版Q3 Sportback 矮咗10mm,令部车望落更加有跑车感。可能大家都係SUV coupe,个人认为车尾部份望过去同「大大哥」Lamborghini 嘅Urus 有几分相似。


车笼入面装备有形状比较正方嘅RS軚盘、更新咗形状嘅波棍头、10.1”触控式中控屏幕、12.2"电子錶板、B&O音响、天窗、全车四个Type C 充电位、360后波泊车cam、电动尾门等等。上面都有提到RS Q3 Sportback 有倾斜式车顶设计形造 SUV coupe嘅外观,但「一针冇两头利」,呢个设计令后座头顶空间打咗唔少折扣,以5呎8吋高度计大概只有两指空位。相对地,前座同膝头嘅空间就充裕好多嘞,调校好驾驶座姿之后前座仲有两个半拳头空位。可以选择嘅行车模式有:舒适(Comfort)、自动(Automatic)、动感(Dynamic)、效能(Efficiency)、个人化(Individual)以及可以自己设定嘅RS模式,一共六个行车模式可以选择。揸得RS 车款又点可以唔讲RS Mode?利用喺軚盘上面嘅「RS MODE」按钮就可以快速由其他模式转换成RS Mode,进入呢个模式除咗电子錶板显示比平时更多嘅行车资讯之外,用家仲可以自由设定部车3个地方:Drive Steering, Engine Sound, Quattro 令部车更加个人化。



行车表现方面,新车畀我嘅第一印象比标準版Q3 嘅避震硬净好多,甚至比绝大多数Audi Q系车款都要嚟得硬净,运动型避震加上高冈性车身令即使有SUV 型车身高度嘅RS Q3 Sportback 亦可以用较为进取嘅车速入弯,提昇唔少信心。呢副比上一代轻咗26KG 嘅EA855 5汽缸引擎再加上 Audi 拿手嘅quattro 四轮系统,行车表现稳定,唔经唔觉好容易就踩到「爆晒錶」,但佢有唔算轻嘅1,775KG 车重再加埋一套21”嘅大軨令加速方面唔觉有好爆炸性表现,贴背感唔大。虽然加速力未必係强项,但一样绝对值得一讚嘅地方係佢套RS 大迫力。SUV 车款「通病」係唔够收,配上一副400 匹机器如果唔够收其实都几危险,但新车就唔觉得唔够收呢个问题。个人认为要令RS Q3 Sportback 成为一部令人会有更热血感觉嘅型格SUV 有两个地方可以改善:即使经过调校过后軚感都係过轻令驾驶者感受唔到太多路面嘅资讯;另外作为站喺Q3 车款最顶尖嘅型号RS Q3 Sportback 略嫌喉声唔够澎湃。


总括而言,虽然RS Q3 Sportback 未必可以好似一般跑车咁,畀到人一种要即刻跳上车嘅感觉,但佢煞食嘅外型同时又拥有SUV 嘅实用性,内在又有副强劲嘅直5 引擎,一部顶级嘅SUV 嚟讲RS Q3 Sportback 要有嘅佢都已经有齐,係车价未必人人负担得起姐!

















RS Q3 Sportback 规格

引擎:2,480 c.c. 直五涡轮增压引擎

马力:400hp/5,850 - 7,000 rpm

扭力:480Nm/ 1,950 - 5,850 rpm

传动:7前速 S tronic 自动波

驱动:前置引擎、quattro 四驱

车身(长x阔x高):4,507 x 1,851 x 1,557 mm

轴距:2,680 mm

车重:1,775kg

售价:$845,000 起

查询:Audi Hong Kong(3465 0000)


Text: Daniel

Photo: Day

郑重声明:本文版权归原作者所有,转载文章仅为传播更多信息之目的,如作者信息标记有误,请第一时间联系我们修改或删除,多谢。

猜你喜欢

最新文章